ភ្នំពេញ៖ ប្រធានសហព័ន្ធយុវជនកម្ពុជា លោក ហ៊ុន ម៉ានី ថ្លែងថា ពាក្យថាសន្តិភាព សាមញ្ញ ងាយស្តាប់ តែមានអត្ថន័យខ្លឹមសារជ្រាលជ្រៅ ហើយមានគុណតម្លៃខ្ពស់សម្រាប់ជាតិនិងប្រជាជន។
លោកលើកឡើងបែបនេះ ក្នុងឱកាសធ្វើបាឋកថា និងសំណេះសំណាលជាមួយយោធាចារ្យ នាយទាហាន នាយទាហានរង ពលទាហាន និងនិស្សិតនៅសាលានាយទាហានសកម្ម នៅថ្ងៃទី២៤ ខែមីនាឆ្នាំ ២០២៣។
លោក ហ៊ុន ម៉ានី បានឲ្យដឹងថា «ពេលដែលយើងមានសន្តិភាព យើងអាចនឹងគិត ថាសន្តិភាពជារឿងសាមញ្ញ។ ក៏ប៉ុន្តែបើយើងចង់ស្វែងយល់ពីតម្លៃពិតនៃ សន្តិភាព ទាល់តែយើងប្រៀបធៀបជាមួយពេលដែលយើងគ្មានសន្តិភាព»។
លោកបានបញ្ជាក់ថា សន្តិភាពពិតណាស់បាននាំមកនូវការអភិវឌ្ឍសេដ្ឋកិច្ច និងសង្គម ដែលនាំឱ្យមានការកសាងហេដ្ឋា រចនាសម្ព័ន្ធគ្រប់បែបយ៉ាង ធ្វើឱ្យប្រសើរឡើងនូវជីវភាពប្រជាពលរដ្ឋ និងកសាងទំនុកចិត្តសម្រាប់វិនិយោគិន។ ជាមួយនឹងទំនុកចិត្តនេះហើយ ដែលជាកត្តានាំមកនូវការរីកចម្រើនឥតឈប់ឈរ។
លោក ហ៊ុន ម៉ានី បានគូសបញ្ជាក់ថា សត្រូវដ៏ធំរបស់សន្តិភាព និងស្ថិរភាពនយោបាយមាន២ នោះគឺ សង្រ្គាម និងការប៉ុនប៉ងផ្តួលរំលំរដ្ឋាភិបាលតាមវិធីសាស្រ្ត «បដិវត្តពណ៌»។
លោកបានឱ្យដឹងថា៖ «ទៅថ្ងៃមុខយើងត្រូវគិតអំពីថាតើយើងត្រូវធ្វើដូចម្តេចដើម្បីរក្សា និងបង្កើនតម្លៃនៃសន្តិភាព ធ្វើយ៉ាងណាកុំឲ្យមានវត្តមានសង្គ្រាម និងបដិវត្តពណ៌នៅកម្ពុជា»៕
